**حلمك الممنوع**بقلم محمود المزين//مجلة مقهى الادب

وفى حلمك الممنوع 
ارسم شباب موجوع 
وبيبكى م الحيرة 
كان العلم مرفوع
نزل العلم م الجوع
واتفضت السيرة
والحلوة بنت بنوت
قالت بعلو الصوت
يا بلادى يا كبيرة
صبح الكلام مكبوت
رخصت عشان القوت
شربت كاسين بيرة
والشيخ محمد كان
فاتح هناك دكان
بيبيع كيسين شيبسى
راحت صبية جنان
بتقوله باكو لبان
وطى وما اتقامش
ندهت وقالت قوم
كان م الهموم مقسوم
قالت خلاص همشى
كل اللى باقى هدوم
من حلمه كان محروم
قرر ما يحلمش
يا أم الحجاب إرهاب
كل اللى واطى اتساب
ومبهدلة دينك
كل الحقيقة سراب
حتى الخيال كداب
ومضيعة سنينك
امتى نفوق ونقوم
ما كفاية غلب ونوم
أكل العماص عينك
الغلب مش مقسوم
واللغز مش مفهوم
مين اللى كارهينك ؟
ففى حلمك الممنوع
ارسم شبع م الجوع
واسبق حدود حدك
كل الحلال مشروع
احلم بمية موضوع
ما تعيشش على أدك
لو قالوا حلم محال
أو حلم صعب منال
لازم يكون ردك
يكفى أعيش فى خيال
عمر الخيال ما اتزال
 مهما الزمان صدك