**صباح الفل**بقلم حسن حفني//مجلة مقهى الادب

صباح الفل يا حبيبه
صباح الورد والأناناس
صباح الحب والطيبه
صباح الرقه والإحساس

***********
يا سمره من سمار لوني
خديني ف حضنك الدافي
يا بيتي ومسكني و كوني
يا منبع للحنين صافي

************
يا حاويه كل شكل ولون
يا سمكه و شكلك ربي
يا أجمل كل شيء في الكون
طريقك في الهوى دربي
***********
يا نجمايه و قمر وناس
وشمس دفاها يملاني
وأشواقي وغرامك كاس
و ليلك أنس و أغاني

***********
يا سمسم في غيطان قلبي
بيملاني خضار و عمار
يا عشق العمر يا حبي
انا عقلي ف هواك أحتار

***********
يا نني عيوني من جوه
أنا مغرم . ... أنا تايه
انا الفارس .... أنا هوه
يا فرح السعد... جوايه

***********
يا سكر والمزاق حادق
يا طعم الغنوه والموال
في حبك 600 عاشق
و سحرك حير القوال

***********
شملتي الوصف والأسماء
وكل جميل .. بيعني لك
ولو قالوا هقول .. أسماء
واشرب شهد من نيلك

***********
بحبك...... وانتي حبيني
قدر مكتوب تشوفه العين
كتبتك ....حصن بجبيني
يا فرحة عمري ف الدارين
************
بحب الحب من حبك
عشقت الآه و التنهيد
و دقت الشهد من قربك
و بسمك خلا فرحتي عيد

***********

تعالي ف حضني و اسقيني
عسل شفاف من ريقك
انا البردان .... دفيني
و ضميني لحنان إيديك

**************
و لا تشبع مسا وصباح
عيوني من جمال سحرك
و قلبك جوه راح و براح
خدي.... خدى علي نحرك