**كلمة واحدة**بقلم محمود المزين//مجلة مقهى الادب

هى كلمة ماليها تانى 
انتى حرة فى كل حاجة 
اكتبى وغنى فى أغانى 
اللقا كان حلمي يمكن
اتمحى فى خانة الأمانى
خلى قلبك يوم يعانى
قلبى عانى بالشهور
وبرضوا كان يدى فى حنانى
كنت راسمك عود بخور
كنت شايفك حد تانى
هى كلمة ماليها تانى
لو دموع عينك بحور
ارحلى وسيبى مكانى
مش ملاك او حتى حور
انتى خارجة من المعانى
اتبنى مية ألف سور
اتخلق بينهم حيطانى
العنى وذلى فى شيطانى
اللى كان يوم جنب منك
اتقلب بقى حد تانى
ألف شكر ليكى إنك
خليتيه إنسان أنانى
من عمايلك للطفولة
من حاجات هدت كيانى
كان لقانا فى سنة أولى
اتقتل ببعادنا تانى
كلمة واحدة ماليها تانى
ابعدى عن قلبى يمكن
تصحى لما فى يوم تعانى
الرجوع مش حتى ممكن
هنسى قلبك لو نادانى
دورى عن ألف غيرى
بكرة تلقى حد تانى
بس مهما يا طير تطيرى
 مش هتلقى فى يوم حنانى