**انسينى**بقلم محمود المزين//مجلة مقهى الادب

انا كنت فى حبك باتمادى
أنا مرة عشقت وحبيت
المدح فى قلبك بقى عادة 
 أشعار تتسجل فى شريط

ووصفت اللمعة اللى فى ننك
ورسمت الدنيا فى أحلام
واديتك أصغر من سنك
 وحكيت قصتنا فى أفلام

وعشقتك من جوه وبره
وقعدت سنين أعشق فيكى
سيبتينى عشان يوم مضطرة
 وعشقت عشان لسه شاريكى

وحكيت للعالم حكايتنا
من يوم ما بدأنا الإعصار
والدنيا بتكتب نهايتنا
 وقلوبنا بترجع أحرار

والقلب اللى اتعلق بيكى
أصبح مشغول جدا عنك
أنا آسف جدا معاليكى
 فيه بنات حلوين أكتر منك

أنا خارج فعلا مش راجع
أنا سايبك يمكن تتربى
الجرح فى قربك كان واجع
 أنا موجوع جدا ومخبى

وفرى أحزانك وسيبينى
أنا طاردك من جنة قلبى
يمكن بالوقت هتنسينى
 أو جايز جداا تتحبى