وانا خدي أشتكىمن حرقة الدمعات
كتف المخدة انجرح
واتشققت عبرات
كفي يخبط
فوق كف العذاب أذن
والحزن وقتة حآن
نادى على صف الشقا
واتنظمت صلوات
سلم على دمع الهوى
رُهبان بترنيمه
نفسه يحضر جِنٌ فرح الليل
بس العزاب طلسم سليماني
لو قلت ياني
بعاني قلة النجمات
و مين يفهم
لا شيخ قاري ولا قسيس
وانا شاري
من باب الحزن
متاريس
قافل على باب الأمل بيبان
حتى شعاع الشمس
كتفته بالأحزان
لفلفت جسمه
ألف مية مليون سنه
وطلعت انا تايه
ما لاقي مِنِّيِ زمان
دنيا تشيل قلبي
والتانيه ترميني
و انا و أنيني سبايا
في السراب نبات
ومين دي اللي اتفُك الطلسم الدموي
و انا من عهدها الأموي
غريق ف بحر م الأزمات
أميره تقول وتتدلع
و تشكي لشهريار حكايات
و انا روحي خلاص زهقت
ما عادت تعشق الملكات
و بحلم
لحظتين فى سكات
أنام ف صدرها الدافي
سنين وسنين
و أحلم إني طفل رضيع
بيشرب م الدفا كاسات
وبتقلب على الجنبين
أشم ف ريحتك أسكر
و أغيب تغيبي ويايا
و كل منايا ما اصحاشي
مُنَى عيني أنام سنوات
أبوس أيدك سيبني أعيش
و أكرر من شريط حلمي
نقط تفتيش
أفتش فيها عن مهدي
و عن ببرونه بالسكر
وعن حلمات و عضاضه
و عن ضرضر طري أخضر
و عن أيدك على خدي
و عن ريحة حنين الليل
و عن راحه و هدوء و سيل
من الحنيه والآهات
و عن أيدك على بقي
وعن يدي
أحسس بيها بسماتك
و فرحة عينك ب ضحكي
أكركر وانشر البسمات
و يوم ما اصحى تبكيني
و لا ترضي تضميني
وأسلم للنصيب قدري
شريط من شعرك الغجري
ب يتلفلف على العشاق
وانا مشتاق لتنهيدك
خديني دم في وريدك
و صبي من المنى كاسات
أغيب من رشفه والتانيه
و يسكرني حنين شهدك
أتوه ف لحظه او ثانيه
يرجعني أنام تاني
و اشم الفرح من حضنك
أفارق شكوة النومه
على خد المخده ساعات
ولا أشكي من الحرقه
ولا تشكي من الدمعات
و ابوس عين الهوى منك
تلات مرات
Aucun commentaire:
Enregistrer un commentaire